Viljormur Davidsen, sum hevur sáttmála við OB, er leigaður í eitt styttri tíðarskeið til Fyn FC, sum spælir í næstbestu donsku deildini.

Viljormur er ein sera sterkur verjuleikari og hevur ment seg nógv ta tíðina hann hevur verið knýttur at OB.

Viljormur er vaksin upp í NSÌ. Hann hevur leikt á øllum føroysku ungdómslandsliðunum. Ì løtuni er hann partur av U-21 landsliðnum sum er í Moldova í løtuni. Fyri stuttum fekk Viljormur eisini landsliðsboð til A-landsliðið.

Frá heimasíðuni fara vit at ynskja Viljormi góða eydnu í Fyn FC og á landsliðnum.

Mikudagin 1 september kl 18.00 skipar Ungdómsnevndin hjá NSÌ fyri stuðulsrenning fyri tey yngru.

Hvat er stuðulsrenning?

Fótbóltsspælarar (bæði gentir og dreingir) hjá NSÍ fara mikudagin 1. september kl 18.00 at renna so langt sum tey klára í 30 min.  

Hvørjum stuðli eg?

Stuðulin skal brúkast til rakstur av ungdómsarbeiðinum hjá NSÌ

Hvussu stuðli eg?

Tann ið stuðlar, játtar seg at gjalda eitt oyratal fyri hvønn metur, sum leikarin rennur í

30 min.

 Hvussu nógv komi eg at gjalda?

Um eg nú játti at gjalda 4 oyru fyri hvønn meturin, hvussu nógv komi eg so at gjalda?

Siga vit at tann tú stuðlar rennur 5000 metur, verður upphæddin 5000 x 0,04 = 200,-

Hvussu geri eg.

Allir leikarnir fáa fimm oyðibløð í part frá liðvenjarunum. Hesi oyðibløð vera so uppgjørd eftir renningina. Møguleiki verður at gjalda kontant og/ella umvegis peningastovn.

Vinningar:                                                                

Í ítrótti er luttøkan ofta vinningur í sjálvum sær, men Fótbóltsdeildin hevur gjørt  av, at rennarnir skulu eisini hava okkurt at kappast um. Tann rennarin í hvørjum aldursbólki, sum fær størsta oyraupphædd fyri meturin, fær eitt gávukort uppá 250 kr, og tann rennarin, ið rennur flest pengar inn tilsamans í hvørjum aldursbólki, fær ein kassa av sodavatn. 

Eisini vera 5 kassar av sodavatni burturlutaðir ímillum øll tey sum stuðla

Aldursbólkarnir eru hesir:

Børn f. Eftir 2002  (yngri enn 8 ár)

Børn f. 2000-2002  (8-10 ár)

Børn f. 1998-2000  (10-12 ár)

Børn f.1994-1997  (12-16 ár)

NB: Sami rennari kann ikki fáa fleiri vinningar. 

Eftir renningina:

Tá øll eru liðug at renna, fáa vit ábit og okkurt at drekka.

Um veðrið er til vildar, so grilla vit, annars fáa vit okkurt at eta í NSÍ hølinum.

Avarðandi hjá børnunum eru vælkomin at hjálpa til, við at staðfesta/skráseta hvussu langt børnini renna.

Á familjudegnum í gjár varð skipað fyri togtogan millum bygdirnar í økinum. Undir fyrireikingunum varð tað hildið at vera eitt gott og jaligt hugskot at bjóða toftamonnum við til togtoganina. Tað skuldi vísa seg, at eingin endi var á blíðskapinum.

8 lið tóku lut – Søldarfjørður, Lamba, Glyvrar, Saltangará, Runavík, Rituvík, Æðuvík og Toftir – og vóru tey øll mannaði við reystum kappum. Nógv fólk varð samankomið, og dúgliga varð rópt á liðini, ið royndu at verja æruna hjá hvør síni bygd. Ur- og brillustovan hevði latið eitt stásiligt ferðasteyp, og var hetta við til at seta mennirnar upp til dystin.

Kappast varð á vøllinum við Løkin beint frammanfyri áskoðaraplássini. Lutakast var um, hvør skuldi møtast í fyrsta umfari. Síðani kappaðust vinnarar móti vinnarum og taparar móti taparum, inntil ein endaligur vinnari var funnin.

John Andersen og Jonhard Hansen stýrdu við kønari men harðari hond kappingini, har liðini hvørt í sínum lagið royndu allar taktiskar snildir fyri at vinna í hesi aldargomlu ítróttargrein.

Sum myndarøðin hjá Biritu Hansen niðanfyri vísir, stóð nógv á, og til tíðir var ivi um, hvørt togið fór at halda. Tá avtornaði gjørdust Toftamenn endaligir vinnarar. Kappingin og sigurin tóktust at hava so mikið stóran týdning fyri teir, at teir m.a. høvdu sjálvan borgarstjóran á liðinum – harvið er tó ikki sagt, at hansara partur lá eftir í toganini. Tað frættist at ferðasteypið inntil komandi ár skal standa í B68-húsinum. Hendan sannroynd skuldi fingið allar sterkar menn í økinum fyri eystan golanheyggjar at ment seg til kappingina komandi ár. Vit mæla til fýra venjingartættir: 1. Styrkivenjing, 2. Takstisk venjing, 3. Tekninsk venjing, 4. Át fyri at økja um samlaðu vektina á liðinum.

Endaliga úrslitið gjørdist hetta:
1. Toftir
2. Søldarfjørður
3. Runavík
4. Æðuvík
5. Saltangará
6. Lamba
7. Glyvrar
8. Rituvík

[View with PicLens]

Líkindini at spæla á Svangaskarði vóru hampulig. Eitt lítið lot lá longs eftir vøllinum, men tað regnaði illa størsta partin av dystinum. Nógv fólk høvdu leitað sær til hesa grannauppgerðina, sum oftast eru ógvuliga spennandi, har báðir partar leggja nógv fyri at vinna.

NSÌ hevði eina øðrvísi liðuppstilling, enn tað sum vit eru von við. Jóhan hevði karantenu, og nýggjur maður í hansara stað var unglingin Per Langaard. Klæmint er skaddur, og í hansara stað spældi Bogi Løkin sum fremsti maður.

Tað var B68, sum fekk bestu byrjanina uppá dystin og legði seg á odda longu í 7. min. B68 fær fríspark úti í vinstru síðu. Øssur leggur ein høgan bólt innfyri. Staddur beint uttanfyri NSÍ brotsteigin setur Poul Jóhannes Justinessen høvdið á og skallar bóltin sera hegnisliga upp í vinstra handara horn, uttan at Gango hevði nakran møguleika at røkka bóltinum. Eitt sera gott mál av Poul Johannes.

Hetta kendist sum ein sjokkbyrjan hjá NSÌ. Men eftir leiðslumálið hjá B68 yvirtók NSÌ spælið og vóru spælstýrandi tað, sum eftir var av fyrra hálvleiki. Við góðum flytingum frá verju umvegis miðjuna og til áleypararnar skaptu NSÍ’ararnir fleiri vandamiklar málmøguleikar. Tað var tí fult uppiborið, at NSÍ javnaði til 1-1 í 22. min. Debes sendir eina langa sending inn í B68 brotsteigin. Bólturin fer fram við allari B68 verjuni, og við aftaru stong høvdar Bogi bóltin niður í jørðina og í málið, uttan at Vlada fekk vart fyri.

Í 23. min. verður okkara ungi raski miðverji Per skaddur. Skaðin var so mikið álvarsligur, at Per noyddist av vøllinum og var sendur á sjúkrahús til kanningar. Vónandi er skaðin ikki so álvarsligur, at Per ikki kemur fyri seg skjótt.

Hetta gjørdi tað neyðugt hjá NSÌ venjaranum Paula at umskipa verjupartin. Einar varð fluttur av vinstra bakki inn í miðverjuna. Heðin kom á vinstra bakk, og Bogi varð fluttur úr álopinum út á vinstra kant. Inn fyri Per kom Árni Frederiksberg, og mannaði hann saman við Christian Høgna álopið.

Í 26. min. leggur NSÍ seg á odda 2-1. Ein bóltur verður sendur inn í B68 brotsteigin. Vlada í B68 málinum kemur út at verja fyri. Staddur uttanfyri 16 meturin velur Vlada at høvda bóltin burtur av vandaleið men beint í føturnar á Árna. Árni spælir bóltin sera skilagott til Christian Høgna, sum setir bóltin í tóma málið.

B68 hevði nakrar fáar málmøguleikar – helst við deyðbóltsstøður. Sendingarnar frá Øssur eru altíð vandamiklar, tí B68 hevur góðar høvdaspælarar sum Keita, Camara og Poul Jóhannes.

Samanumtið er at siga um fyrra hálvleik, at B68 fekk eina góða byrjan og hevði mest trýstið fyrstu 5-10 min. Síðan yvirtók NSÍ alt spælið og legði B68′arnar undir stórt trýst, og tað var fult uppiborið, at NSÍ hevði 2-1 leiðslu við hálvleik.

Næstan allan seinna hálvleik sat B68 á dystinum. Teir skaptu fleiri vandamiklar málmøguleikar og eina røð av hornaspørkum. Áleypararnir hjá B68 vóru tó ikki nóg neyvir í avgerandi løtunum. Í 65. min. javnar B68 uppiborið til støðuna 2-2. Eftir rættuliga tilvildarligt spæl framman fyri NSÌ málið gerst Ndende púra fríur og hevur lætt við at seta bóltin í málið.

Debes verður tikin út í 75.  min. og inn í hansara stað  kemur Jann Martin. Í 78. min. verður Bogi vístur av vøllinum, eftir at hann fær sítt seinna gula kort. Hetta gjørdi tað truplari hjá NSÍ at standa ímóti B68 trýstinum, sum helt áfram.

Í eini takling verður Jens skaddur men heldur áfram at spæla.  Óivað darvaður av skaðanum fellur Jens í 85. min. Camara inni í NSÍ brotsteiginum. Dómarin Páll Augustinussen var ivaleysur og dømir brotspark til B68. Øssur tekur sær av brotsparkinum, og sera trygt setur hann bóltin í málið til endaligu støðuna 3-2.

Samanumtikið er at siga um seinna hálvleik, at B68 liðið trýsti NSÍ langt aftur á vøllin og var greitt omaná.

Hetta var so fyrsta tapið hjá NSÍ síðan 18 apríl, tá NSÍ mátti lúta fyri HB í Gundadali. Fyrr ella seinni kundi væntast, at liðið fór at tapa. At tað so var fyri grannunum á Toftum kennist óivað súrt hjá spælarunum. Sjálvt um NSÍ tapti dystin, liggja teir framvegis á einum fyrsta plássi við eini fimm stiga leiðslu, áðrenn hinir dystirnir í hesum leikumfarinum verða leiktir í morgin.

Hjá okkara monnum ræður um at leggja dystin í kvøld aftur um bak og herja á aftur næsta dyst. Vit eru sera stolt av tykkum, og vónirnar til komandi dyst eru góðar, tá NSÍ møtir ÍF mánadagin 13. september á heimavølli.

KOYR Á NSÍ – SAMAN STANDA VIT STERK.

HAGTØL:

B68-NSÍ 3-2 (1-2)

7.  min. 1-0: Poul Jóhannes Justinusen B68

22. min. 1-1: Bogi Løkin NSÍ

26. min. 1-2: Christian Høgni Jacobsen NSÍ

65. min. 2-2: Ndende B68

85. min. 3-2: Øssur Hansen B68 (brotspark)

NSÌ liðið: Gango, Jens, Per (23. min. Árni, 80. min. Erland), Einar, Jónhard, Jústines, Jann Ingi, Heðin, Debes (75. min. Jann Martin), Christian Høgni og Bogi

Niðanfyri eru myndir, sum Johnny Lamhauge tók.

[View with PicLens]

Í samband við familjudagin hjá NSÍ í dag hevur ein dómsnevnd burtur úr rúgvuni av stuðlum hjá NSÍ valt ein, ið trúfast hevur møtt til dystir hjá felagnum og stuðlað í við- og mótráki.

Valið fall á Maritu Joensen. Hon er m.a. mamma til Jens Joensen, ið spælir í miðverjuni hjá NSÍ.

Marita er so spent til dystirnar hjá NSÍ, at hon ikki rættiliga torir at hyggja, tá mótstøðuliðini eru í okkara hálvu. Tí hava onkur mælt til, at hon bert skal gjalda hálvt atgongumerki.

Marita var sjálv burturstødd í morgun, og var tað tí maður hennara, Hjalti Joensen, ið tók móti heiðursbrævinum. Heiðursbrævið varð handað við Toftavatn, og vóru eini 60 fólk møtt til hátíðarløutna. Síðani varð farið aftur til vøllin við Løkin, har NSÍ bjóðaði morgunmat.

Nógv fólk er annars við Løkin í dag, har alskyns tiltøk og gott veður hava myndað ein góðan familjudag. Niðanfyri eru nakrar myndir, sum Birita Hansen tók.

[View with PicLens]

Síðani 1-1 dystin móti EB/Streymi við Margáir seinasta mikukvøld hava tit havt høvi at velja dagsins mann í dystinum.

Eins og seinast valdu tit frálíka málmann okkara, András, til dagsins mann við 45% (81 atkv.) av teimum 181 givnu atkvøðunum. András hevði nógvar frálíkar bjargingar bæði í einum, fyri okkara viðkomandi, heldur ivasamum fyrra hálvleiki, og í endanum av dystinum, tá EB/Streymur trýsti aftur.

Báðir innskiftu leikararnir, Árni og Debes, gjørdust nummar tvey og trý við ávikavist 16% (29 atkv.) og 8% (15 atkv.). Teir vóru báðir eyðsýndir í tí góða seinna hálvleikinum.

Vit ynskja Andrási hjartaliga tillukku við heiðrinum og ynskja annars øllum liðinum góða eydnu í seinasta dystinum móti B68 í ár – á Svangaskarði í kvøld kl. 18.00.

Eftir dystin verður opnað fyri nýggjari atkvøðugreiðslu.

Í morgin spælir NSÍ ein sera týðandi dyst móti grannunum fyri vestan – B68.

Fyri uttanveltað snýr hesin dysturin seg kanska um stig á stigatalvuni. Men í annaðkvøld klokkan 18 verður stigatalvan løgd til viks eina løtu. Hesin dysturin hevur nógv meiri at siga enn nøkur stigatalva.

Á skránni er ein tann mest spennandi lokaluppgerðin í føroyska fótbóltsheiminum. Dreingirnir, ið trína á vøllin, eru uppvaksnir hvør um annan, hava spælt á sama liði til tíðir, men nú eru teir vaksnir og skulu dystast móti hvørjum øðrum.

Tíbetur hevur tað gingist væl hjá okkum móti B68 í ár. Men í rættinum at reypa sær mótvegis grannunum nyttar tað einki. Tað er bara tann seinasti sigurin, ið telur.

Úr báðum legum verður vónað, at  nógv fólk stuðlar sínum liði á Svangaskarði í morgin.

Ætlanin er at ganga í felag frá vøllinum við Løkin og eftir nýggju gøtuni niðan á Svangaskarð. Farið verður av vøllinum umleið kl. 17.20 við Guliganz á odda.

Møtið fjølment og vísið tykkara stuðul, gjarna í litum felagsins!

Byrjunaruppstillingin líktist nøkulunda henni, sum vit hava sæð nógvar teir seinastu dystirnar: András, Jónhard, Jens, Jóhan, Einar, Bogi, Jústinus, Jann Ingi, Heðin, Christian Høgni og Klæmint. Á bonkinum vóru Kristian, Per, Erland, Debes og Árni. Jann Martin var leikbannaður.

EB/Streymur byrjaði dystin betri. Teir tóktust meira uppsettir – tað sást beinanvegin, at teir ætlaðu sær øll trý stigini. Hjá NSÍ hinvegin bar lítið til – sjálvt vanligar avleveringar og temjingar vístu seg at vera truplar. Okkurt gott spæl var, men sjálvdan endaði tað við einari beinleiðis atsókn at EB/Streyma málinum.

Jann Ingi hevði eitt skot uppum málið í 6. minutti eftir fríspark frá Einar í vinstru síðu. Men tað var EB/Streymur sum tók leiðsluna, tá Arnbjørn Hansen høvdaði bóltin í málið í 8. minutti.

Næstu 10 minuttirnar royndi NSÍ at flyta spælið longur niðan, men tað vísti seg at vera trupult at fáa bóltarnar framvið Egil og Sorin í verjuni. Klæmint høvdaði eftir innlegg frá einar í 22. minutti, Einar hevur eitt skot langt útifrá í 27. minutti, og Christian Høgni skjeyt útifrá í 31. minutti. Bogi hevði eisini ein kjans í 42. minutti eftir horna, men har var ov tjúkt fyri.

Fyrri hálvleikur var partvís eitt framhald av dystinum í Runavík, har EB/Streymur dugdi væl at forða okkara uppspæli, til tíðir í so kontant, og partvís var hálvleikurin merktur av, at tað var altavgerandi fyri EB/Streym at fáa øll stigini í dagsins dysti. Tá farið varð til hálvleiks sat man við eini kenslu av, at spælið hjá NSÍ hevði ikki riggað serliga væl, og at man kanska skuldi vera nøgdur við, at støðan ikki var verri enn 1-0. András var sera eyðsýndur – vit halda okkum veruliga hava føroya besta málmann í løtuni.

Fleiri av okkara spælarum hava havt smáskaðar at drigist við í seinastuni, og í hálvleikinum varð Debes settur á vøllin fyri Jann Inga. Bogi fór inn á miðvøllin, og Debes út í høgru síðu.

Okkara dreingir vóru sum hamskiftir, tá teir komu út til annan hálvleik. Longu í 48. minutti høvdu Debes og Klæmint eina dupulta skotroynd. Og í 51. minutti høvdu vit tvey fríspørk slag í slag í vinstru síðu. Hetta boðaði frá góðum.

NSÍ leikararnir tóktust nú meiri ágrýtnir allastaðni á vøllinum. Teir løgdu meiri fyri í taklingum, og avleveringar riggaðu, og tað góða spælið kom fram.

Í 60. minutti skjeyt Christian Høgni uppum eftir gott álop við Heðini í vinstru síðu, og Klæmint hevði eina skotroynd eftir jørð í 62. minutti.

Nógva NSÍ trýstið hevði við sær, at NSÍ hevði fleiri royndir á málið næstu løtuna.

Í 78. minutti kom Árni inn fyri Klæmint, ið tóktist nakað darvaður. Árni herjaði við sínum ungu frísku beinum beint á EB/Streyma verjuna, sum var byrjað at síggja nakað tung út. Hetta hevði m.a. við sær eina komiska støðu, har Árni, ið neyvan vigar nógv meiri enn 100 pund, gjørdi fríspark móti Sorini, ið annars allan dystin hevði sett seg hart ígjøgnum yvirfyri áleyparunum hjá NSÍ, uttan at dómarin hevði dømt nakað fyri tað.

Í 84. minutti fluktaði Debes móti málinum í høgru síðu, og í 85. minutti kom so endiliga hol á, tá Árni skjeyt hart og flatt beint í málið. Fagnaðurin var øgiligur. EB/Streymur ressaðist nú aftur fyri at fáa øll stigina aftur til høldar, men endaliga úrslitið gjørdist 1-1.

Tað er eingin ivi um, at tað var meiri umráðandi hjá EB/Streymi at fáa øll stigini í kvøld. Um hugt verður at dystargongdini, vóru vit ivaleyst heppin at koma til hálvleiks við 0-1. András átti sín stóra leiklut í, at EB/Streymur ikki fekk meiri enn tað eina málið. Hann hevði fleiri sera góðar bjargingar, og vísti seg at vita, júst nær hann skuldi koma út í 16 meturin, og nær hann skuldi halda seg í málinum.

Men hinvegin sótu vit á spælinum í seinna hálvleiki, og tað gav eisini úrslit.

Tá hini feløgini í oddinum, HB, ÍF og Víkingur, eisini fingu javnleikir í hesum umfarinum, hevði tað við sær, at støðan er óbroytt. Fyri NSÍ lagaðu úrslitini seg tí væl. Vit kunnu fegnast um, at vit ikki hava tapt seinastu 15 dystirnar.

Úr dystinum kann samstundis dragast tann lærdómur, at hóast vit spældu nógv verri og komu afturum við einum málið móti einum oddaliði á útivølli í fyrra hálvleiki, so ber tað kortini til at venda gongdini, at vera leikliga greitt omaná í seinna hálvleiki og at fáa stig burturúr.

Næsti dystur er á Toftum leygardagin.

Liðið: András Gango, Jóhan Troest Davidsen, Jens Joensen,  Jónhard Frederikberg, Einar T. Hansen, Jústines R. Hansen, Jann Ingi Petersen (46 min. Debes Danielsen), Bogi Løkin , Heðin á Lakjuni, Christian Høgni Jacobsen og Klæmint A. Olsen (78 min. Árni Frederiksberg). Á beinkinum uttan at koma inn: Kristian Joensen, Per Langaard og Erland B. Danielsen.

Gul kort: Jóhan (20. min.), Bogi (60. min.) og Heðin (76. min.)

Niðanfyri eru myndir, sum Birita Hansen tók.

[View with PicLens]