Oddur Højgaard skiftir í gult
29-ára gamli toftamaðurin hevur skrivað undir sáttmála við NSÍ.
Oddur Højgaard hevur seinasta kappingarárið spælt við EB/Streymi, har hann hevur verið fastur maður í miðverjuni. Á Toftum spældi hann mest í verjuni, men eisini í álopinum. Oddur hevur eisini umboðað danska felagið B1908.
Oddur hevur spælt 109 dystir í bestu deildini, og hevur hann skorað 8 mál.
Ítróttarstjórin hjá NSÍ, Eyðstein Skipanes, sigur soleiðis um nýggja leikaran: – ‘Oddur er ein stórur og sterkur miðverji, ið hevur spælt ógvuliga væl í EB/Streymi í ár. Tá Jens Joensen herfyri boðaði frá, at hann fyribils gevst við fótbólti á hægsta stigi, so mettu vit, at neyðugt varð at styrkja verjuna, og valið fall á Oddur’.
Hópurin hjá NSÍ er ikki endaliga komin uppá pláss, og okkurt bendir á, at tað verða onkrar, men ikki stórvegis, broytingar afturat í hópinum.
Vælkomin til Runavíkar, Oddur!
Saman standa vit sterk.
Kelda: faroesoccer.com