Grein í Vespuni til dystin móti 07 Vestur
Eg var ikki sørt tikin á bóli, tá eg var til dystin móti B36 í Gundadali hendan dagin.
Ikki av úrslitinum, ella spælinum, ella nøkrum øðrum, ið fór fram á vøllinum.
Men eg fekk eina áheitan at skriva eitt innlegg til komandi Vespuna. Tað hevði eg ikki roknað við.
Ikki tí, eg eri NSÍ’ari um ein háls, men eg síggi ikki so nógvar dysti, sum eg kundi hugsað mær.
Stórstu skreytirnar sum NSÍ’ari gjørdi eg fyrsta árið, ið eg leikti við NSÍ. Tað var við smádreingjunum, afturi í 1979. Vit høvdu tann legendariska Tummas hjá Hennebeth sum venjara, og hann hevði verið venjari í fleiri ár, men tað var nær við og næstan hvørja ferð. Eg haldi, at HBa vann hvørja ferð.
Men í 79 bragdaði tað.
Faktiskt var hetta fyrsta FM heitið hjá NSÍ nakrantíð. Gott nokk vunnu vit 2. deild í 1978, men tað æt ikki FM, men vinnarar av 2. deild.
Eg minnist næstan hvønn einasta dyst, men lunnarnir undir FM heitið vóru lagdir eftir ein sera spennandi dyst móti HBa í Havn í oysandi áarføri á niðara vølli í Gundadali,har vit vunnu 4-3. HBa snávaði á Sandi móti B71, so gjørdi tað onki, at vit taptu seinna dystin móti HBa við Løkin í Runavík, tí vit vunnu allar hinar dystirnar. Um eg minnist rætt, vóru ÍF og Skála eisini í okkara bólki. Vit komu víðari úr bólkinum, og møttu KÍ í semifinaluni, og meini vit vunnu fyrru finaluna í Runavík við 5-0. Seinna var spæld í ivasomum veðri, grovur heglingur seinastu løtuna, men vit vunnu hóast tað 3-2.
So skuldu 2 finalur spælast móti Streymi. Fyrst á Skála. Dysturin endaði 0-0, men dómarin segði, at dysturin skuldi avgerast, so tað bleiv longd leiktíð og brotssparkskapping, ið vit vunnu. Men Streymur kærdi avgerina, og fingu viðhald, soleiðis, at tá vit møttust við Løkin stóð alt á jøvnum, tá vit byrjaðu.
Seinna finalan var eisini jøvn, vit komu á odda 1-0 í fyrra hálvleiki, men teir javnaðu í seinna. So tað bleiv aftur brotsspørk. Tá 5 vóru skotin í part stóð framvegis á jøvnum. Høvdu brent eitt brotsspark í part. Vit skutu fyrst, og tað 9’inda og seinasta brotssparki hjá okkum varð eg biðin um at skjóta, og tað sat dygst útivið vinstru stong, málmaðurin fór hinvegin. Okkara málmaður, Jón Hansen, tók so teirra skot, og so vóru vit meistarar.
Eg minnist at tað vóru nógvir áskoðarar til dystin, og 1. deild spældi aftaná, men tá fóru fleiri av áskoðarunum til hús. Kanska var niðurflytingin longu staðfest.
Aftur til nútíðina 😊
Nú eru bert 3 umfør eftir, og støðan er soleiðis, at vit hava nógv best kort á hondini til at gerast FM vinnarar í ár. So tað er háspenningur í luftini. Tí tað eru longu langt síðan at einasta FM heiti kom til høldar. Ja, so langt síðan, at fleiri,ið ikki vóru fødd tá, hava fingið koyrikort í dag. So tað er tíð uppá.
Nú er tað, at vit fjepparar mugu vísa okkara dygga stuðul, sum kann bera leikararnar tey síðstu fetini fram móti FM.
Ikki so, at vit skulu taka alt í einum, men sum vit kenna tað so væl EIN DYST Í SENN.
Koyr á NSÍ.
